MUM

MUM

vox Persica, ceram notat, quâ non minus, quam melle, cadavera condiri olim consuevisse, discimus ex Herodoto Musâ 4. ubi Scythas refert Regis mortui corpus κατακεκηρωμένον per

totam Scythiam circumtulisse, antequam terrâ conderent: et Muisâ 1. ubi de Persis, κατακηρώσαντες, inquit, τὸν νεκρὸν γῆ κρύπτουσιν. Unde Cicero Tusculan. l. 1. Persae iam cerâ circumlitos condiunt, ut quam maxime corpora permaneant. Et Strabo l. 15. θάπτουσι δὲ κηρῷ περιπλάςςοντες τὰ σώματα, Sepeliunt autem cerâ circumlinentes cadavera etc. Hinc itaque Mumiae vox notissima, quâ quid notetur, infra videbimus. Addam hîc saltem, sine ratione statuere nonnullos, in Iudaea quoque Mumias effodi, non minusac in Aegypto. Constat enim Iudaeos non condiisse corpora mortuorum, qui mos Aegyptiis peculiaris. At Iudaei, cum plurimis unguentis et aromaribus defunctos suos sepeliebant, eôdem prorsus more, qui apud Graecos et Romanos viguit; Lavabant cadavera, ungebant pretiosis unguentis et fasciis involuta condebant sepulchro: Aegyptii insuper exenterabant et condiebant, ut servari possent et in saecula durare. Unde hodieque mumiae sepulchrorum in Aegypto reperiuntur et eruuntur. Nec hoc omittendum, gentem hanc cadavera primitus domit subrecta in loculo ad parietes statuisse, sed postmodum imposuisse lectulis, uti docet Athanasius. Sil. l. 13. v. 474.

——— Aegyptia tellus

Claudit odoratô post funus stantia saxô

Corpora, et a mensis exsanguem hand separat umbram etc.

Vide S. Bochart. Hieroz. Part. poster. l. 4. c. 13. Salmas. ad Solin. passim, ubi inter alia mumias et momias dictas contendit, a ture, quod ἄμωμον vocabant, Leonardum Fuchsium ad Myrepsum sect. 1. c. 13. Alios. Gabbara Aegyptiis mumiam dici, tradit Dominicus Macer in Hierolexico. Hinc igitur Mumiae, vulgo dicuntur medicata corpora, i. e. cadavera defunctorum, quae aromatum exquisitissimis generibus ex more gentis condita, aevum perdurant, et post multa annorum milia, integra penitus, sed in ligni duritiem rigida, in Cryptis locisque subterraneis Aegypti, subinde magnô labore eruuntur, in antiquitatis ostentationem, et Medicum insuper usum. Sunt autem hae Cryptae e vivo alabastro excisae ac variis concamerationibus, velut ingentibus aulis distinctae, ut Labyrinthus aliquis videri possint: Quarum nobilissimam, iuxta Memphim hodiernam, vulgo Cairo, describit Petrus a Valle Itiner. tom. I. et ex eo Kircherus Iesuita t. 3. Synt. 13. c. 4. Aliam eiusmodi ichnographiam delineavit, qui coram Cryptas illas lustravit, Tit. Livius Burratinus, Poloniae Regis Architectus, apud eundem Kircheum cit. Synt. 13. de Mumiis.